Die schnelle Information über eine bemerkenswerte Kirche

Aktualisiert am 28.01.02 21:28 - Redaktion


26.05.99 Zur Ereffnig vo der Konferänz 1999 vo der EMK

Liebe Bischof
Liebi Konferänz

Hoch iber Basel, uf der Chrischone,
wo fascht nur frommi Mensche wohne,
duet d EMK ab hitte daage,
in aigner Sach, das ka me saage.

Die glaini Kirche het e Gwicht,
das gsehsch scho a de vyyle Bricht,
wo s Seggretariat het schigge lo
und Sie au sicher hän bikoo!
Ych ha die Enveloppe gwooge,
und was i saag, das isch nit glooge,
850 g Papier, und das per Boscht,
was das scho numme Porto koscht!

Sie hän die Bricht genau studiert,
sich hoffentlig nit drum foutiert,
s wird z reede gä iber Finanze,
iber Uffdreeg und Vakanze,
neii Bezirkskonzeptione,
Vorschleeg fir Suchtpräventione.
Ischs Ehrenamt Vergangehait,
gits freiwilligi Mitarbeit?
Wie goht's mit der Viktoria,
foht me dert vo vornen a?
Kasch der Herr im Himmel oobe
au mit em neie Gsangbuech loobe?
Was isch Inter -, was Supervision,
git's Frooge zer üssere Mission?
zum Fraue- und zum Männerdienscht,
zue Sunntigschuel und Gottesdienscht?
Iber das und no vyyl meh,
wird’s z reede gä, de wirsch es gseh!

Vo morn a duet me debattiere,
iiber Anträg diskutiere,
der Bischof wird zerscht informiere,
und alli wärde's bschtimmt notiere.
Villicht heersch aine proteschtiere,
will ebber z lang duet referiere.
E baar dien fescht sich engagiere,
doch die ander Mainig respektiere.
Däne, wo sich dien retiriere,
wird me härzhaft applaudiere,
und alle, wo dis Johr jubiliere,
duet me sicher gratuliere.
Die wo d Theme nit dien intressiere,
die gehn in Garte go spaziere.
Am Sunntig duet's aim intressiere,
weli Pfärrer disloziere,
denn goht me haim go rapportiere
und duet sy Gmaind orientiere.

Das isch nyt neis, denn das isch jo
scho ebbe hundert Joor eso.

D Gmainde in der Regio
findes glunge und sin froh,
dass Ihr in unsri Stadt ko sin,
fir uns isch das en ächte Gwinn.
Härzlig willkumme, liebi Lyt
ob er kemmet vo nooch oder wyt,
mir hoffe, dass Ihr Eych wohl dien fyyle,
alles anderi wär zem schloofe,
wenn nit, denn wär's e Katastrophe.
Em Bischof und der Konferänz
wintsche mir mit Vehemänz
e fruchtbar Tage und vyyl Muet,
denn kuunt's am Schluss ganz sicher guet.
Nit zletscht, und do da isch's is glääge,
Gottes Byystand und sy Sääge!

Quelle: Gérard Schaffner